ನಿರೀಕ್ಷೆ

ತಿಳಿನೀರ ಕೊಳದಲ್ಲಿ

ಚಳಿಯ ಗಾಳಿಗೆ ಸೋಕೆ

ಎದ್ದ ಅಲೆಯಂತಾಗಿ ಅದುರುತಿರುವೆ

ಕಮಲಗಳ ಸೋಕದಲೆ

ನನ್ನ ಚಳಿನನಗಿರಲಿ

ಎಂದು ತಂತಾನೆ ನಾ ಕೊರಗುತಿರುವೆ

ತಾರೆಗಳು ನಗುವಾಗ

ಇಳಿಸಿಕೊಳ್ಳುತ ಒಳಗೆ

ನೀರಲ್ಲೆ ಚಿತ್ತಾರ ಬರೆದು ನಲಿವೆ

ಕಾಯುತಿಹೆನಾ ಬೆಳಕ

ರಂಗುಗಳ ಸರಿ ಎರಕ

ಹೂಗಳರಳುವ ಪುಳಕ

ಬೆಳಕಿನೊಳು ಬೆಳಕನ್ನು ತುಂಬಿಕೊಳುವೆ

ದಾಸವಾಳ

ನಿನ್ನ ಸೆಳೆವ ಗಂಧವಿಲ್ಲ

ನೀನೆ ಎಂಬ ಬಂಧವಿಲ್ಲ

ಇರುವಿನರಿವೆ ಒಲವು ತುಂಬಿ ನಗುವು ಮೊಗದಲಿ

ಬೆಳಕುದೇವ ನಗುವ ಕೊಟ್ಟ

ಹಕ್ಕಿ ಹಾತೆಯೊಲವನಿತ್ತ

ಕಂಡ ಮನುಜ ತಾನೂ ಒಳಗೆ ಬೆಳಗಿಕೊಳ್ಳಲಿ

ಹಾಸ ಹಂಚುವಾಸೆಯಲ್ಲಿ

ದಾಸಿಯಾದೆ ಸೃಷ್ಟಿಗಿಲ್ಲಿ

ದಾಸವಾಳದಾಳದೊಲುಮೆ ಸಿರಿಯ ಹಂಚಲು

ಅರೆನಿದ್ದೆಯ ಪದಗಳು

ನವಿರು ನೂಪುರ ನಾದ
ಕಣ್ದೆರೆಯೆ ಕನಸು
ಮುಸುಕು ಮೋಡದ ನಡುವೆ
ಮುಸಿನಕ್ಕ ಚಂದಿರ

ಹಸೆಯ ಹಾಕಿದ ಹಾಗೆ
ಹುಸಿಯೆ ಬಳೆಗಳ ಸದ್ದು
ಹೊಸಿಲ ಬಾಗಿಲ ತೆರೆದೆ
ಚಳಿಗಾಳಿಗೂ ಮತ್ಸರ

ಅಂಗಳದ ಚಪ್ಪರದಿ
ಬೆಳೆದು ಬಿಳಿದಿದೆ ಕಂಪು
ನಾರು ಹೊಸೆಯುವ ಹಾಡು ಎನಿತು ತಂಪು
ಕಟ್ಟೊಂದು ಕೂಸು ಜೋಗುಳವ ಕೇಳಿರ?

ಕನಸು ಕಟ್ಟಿದೆ ಇರುಳು
ಮೊಲ್ಲೆ ಮುಡಿದಿದೆ ಹೆರಳು
ಎಲ್ಲೋ ಕಾದಿದೆ ನೆರಳು
ಇಲ್ಲಿ ನಿದ್ದೆಗೂ ಬೇಸರ!!

ಸಾಕಷ್ಟು ಸತ್ತು

ಮಾವಿನ ನಾರುಗಳೆಡೆಯಲಿ ತುಟಿಯಿಟ್ಟು ರಸಹೀರುತ್ತಾ

ಕಪ್ಪೆಗಳ ಆಲಾಪದ ಅರ್ಥ ಹುಡುಕುತ್ತಿದ್ದೆ

ಇಲ್ಲಿ ಎದೆ ನಿನ್ನ ಕರೆದಾಗ ಕಿವುಡಾಗಿ ಗೊರೆಯುತ್ತಾ

ಮತ್ತೆ ಏನೂ ಕೇಳದಂತೆ ಗೊರೆಯುತ್ತಿದ್ದೇನೆ

ಎಲ್ಲೋ ದಾರಿ ತಪ್ಪಿದ್ದೇನೆ!

ಎಲೆಯಿಂದಲೆಲೆಗೆ ಇಳಿದ ಹನಿಗಳ ಸದ್ದು

ಭುವಿಯೊಡಲಲ್ಲಿ ಪಿಸುಗುಟ್ಟುವಾಗ ನಿದ್ದೆಗೆ ಜಾರುತ್ತಿದ್ದೆ

ಈಗ ನೋಡಿದರೆ ಫ್ಯಾನಿನ ಲವಲವದಲ್ಲಿ ಮಗ್ಗುಲು ಬದಲಿಸಿ

ಕರೆಂಟು ಹೋದಾಗಲೆಲ್ಲಾ ನೂರೆಂದು ಶಪಿಸಿ ಕಾಲ ತಳ್ಳಿದ್ದೇನೆ

ಎಲ್ಲೋ ತುಕ್ಕು ಹಿಡಿಯುತ್ತಿದ್ದೇನೆ!

ಜಗದೇಕವೀರರ ಕತೆಕೇಳಿ ಅದರ ಕನಸಲಿ ಬಿದ್ದು

ಇಲ್ಲದ ಮೀಸೆ ತಿರುವುತ್ತಿದ್ದೆ

ಕ್ರೀಂ ಮರೆತ್ತದ್ದಕ್ಕೆ ಹಲ್ಕಚ್ಚಿ ಹಾಗಾಗೇ ಕೆರೆದು

ಸೂಟಿನಲಿ ಸೇರುತ್ತ ಸಂತೆಗೆ ರೆಡಿಯಾಗಿದ್ದೇನೆ

ಸಕಷ್ಟು ಸತ್ತು ಮರುಸುತ್ತು ನಗುತ್ತಿದ್ದೇನೆ!

ನಾನು

ನಿನ್ನೆಯ ಹೆಣ

ನಾಳೆಯ ಮಗು

ಸಾವಿರಾರು ನಾಳೆಗಳ ಬಸುರಿಯಾಗಿ

ಸತ್ತು ಹುಟ್ಟಿ, ಹುಟ್ಟು ಹಾಕುತ್ತ

ಮರಣ ಜನ್ಮ ಪ್ರಸವವೇದನೆಗಳ ಸಮರಸವ

ಸವಿಯುತ್ತ ಬದುಕುವಾಗ

ಆದಿ ಅಂತ್ಯಗಳ ಗೊಡವೆ ನನಗೇಕೆ?

ನಾ ನಡೆದಷ್ಟೂ ಜಗವು ಅರಳುತ್ತಿರಲು

ಕಣ್ಣು ತೆರೆದಷ್ಟೂ ಬಣ್ಣ ಕೆರಳುತ್ತಿರಲು

ಬೆಳಕು ಕರೆಯುತ್ತಿರಲು

ಮತ್ಯಾಕೆ ಬೇಕೆನಗೆ ಇಲ್ಲದ ಗೋಳು?

ನಿನ್ನೆಗಳ ಹೆಣಹೂತ ಭೂಮಿಯಲಿ

ನಾಳೆಗಳ ಬೀಜನೆಟ್ಟು

ಚಿಗುರುವ ಚೆಂದಕ್ಕೆ ಕಾಯುವ ಮಗು ನಾನು

ನನಗೊಂದು ಬೇಲಿ ಬೇಕೇನು?