ಎಲ್ಲಿದೆ?

ಕಪ್ಪು ಮಣ್ಣು

ಬಿಳಿಯ ಮೊಳಕೆ

ಹಸಿರು ಜೀವ

ಮಳೆಯ ಹರಕೆ

ನೀಲಿ ಬಾನು

ಬಾನ ಕಣ್ಣು

ಕಣ್ಣ ಬೆಳಕು

 ಬೆಳಕು ಒಂದೆ

 ಬಣ್ಣ ನೂರು

ಬೆಳಕು ಬಣ್ಣ

ಬಣ್ಣ ಹೂವು

ಚಿಟ್ಟೆ ನಾವು

ನಾವು ನೀವು

ಕಾಲ ಕಾಲು

ನಿಲ್ಲದಾಳು

ನಿನ್ನೆ ನಾಳೆ

ಎಲ್ಲಿ ಹೇಳು

ಮಣ್ಣಿನಿಂದ ಬಣ್ಣವಾಗಿ

ಬಣ್ಣದಿಂದ ಬಾನಿಗೇರಿ

ಬಾನಿನಲ್ಲಿ ಬೆಳಕಸೇರಿ

ಬೆಳಕು ಬಣ್ಣ ತೆರೆದಿದೆ

ಎಲ್ಲ ತನ್ನತನವೆ ಮೆರೆದಿದೆ 

ಇಲ್ಲಿ ಎಲ್ಲಿ ನನ್ನ ತನವಿದೆ?

ಹಣತೆ

ಹಣತೆ
ಸಣ್ಣ ಅಳತೆ
ಬೆಳಕು ಕತ್ತಲ ಕವಿತೆ

ಕವಿತೆ
ಎದೆಯ ಒರತೆ
ಸಾಗರದ ತೊದಲು ಕಂಡಿತೆ ?

ಕಂಡಿದ್ದು ತಿಳಿವಂತೆ
ಕಾಣದ್ದು ಹೊಳೆವಂತೆ
ಸಾಲು ಸಾಲು ಹಣತೆ

ಹಣತೆ
ಕಣ್ಣ ಕವಿತೆ
ನಕ್ಕಲ್ಲೆಲ್ಲಾ ನೂರು ಒಲವಿನೊರತೆ

ಯಥಾರ್ಥ

ಅರ್ಥದ ಅಮಲಿಗೆ

ಬಲಿಯಾಗಿ ಕದಡಿ ಹೋದರೀಗ

ತಿಳಿಯಾಗುವುದು ಹೇಗೆ

ತಿಳಿವಾಗುವುದು ಹೇಗೆ

ಹೊಳೆಯುವುದು ಹೇಗೆ

ಹೊಳೆಯಾಗಿ ಹರಿಯುವುದು ಹೇಗೆ

ಅರ್ಥ ತಾನಿತ್ತೆ?

ಮಾತು ಹುಟ್ಟುವ ಮೊದಲು

ವ್ಯರ್ಥವಾಗಿತ್ತೆ?

ಮೌನಜಪಿಸಿದ ಮಂತ್ರ

ಬೀಜ ಮೊಳೆತಿತ್ತೆ?

ಶಬ್ದ ಶಬ್ದವೂ ಮಾಯೆ

ಮರುಳು ಬೇಕೆ?

ಅಳುವ ಮಗುವಿರೆ

ತಾಯ್ಗೆ ಸೆರಗು ಬೇಕೆ?

ದನಿಯ ಮೀರಿದ ಅರ್ಥ

ಒಲಿಯಬೇಕೆ?

ವಲ್ಮೀಕ ಸ್ತುತಿ

ಹೊನ್ನ ಜಿಂಕೆ

ಜಿಂಕೆ ಕಣ್ಣು

ಕಣ್ಣ ಕಾಡಿಗೆ

ಕಾಡಿ ಕಾಡಿಗೆ

ಕಾಡ ಜಾಡಿಗೆ

ಹಾ ಲಕ್ಷ್ಮಣಾ...

ಸೀತೆ ಲಂಕೆಗೆ

ಜನರ ಶಂಕೆಗೆ

ಶಂಕೆ ಬೆಂಕಿಗೆ

ಬೆಂಕಿ ಬಾಯಿಗೆ

ಬದುಕು ಕಾಡಿಗೆ

ಕಣ್ಣು ಕಾಡಿಗೆ

ಕಾಡ ಕಣ್ಣಿಗೆ

ಕಣ್ಣನೀರಿಗೆ

ನೀರ ನೀರೆಗೆ

ಬಾಯಾರ್ದ ನೀರೆಯರಸಗೆ

ರಸರಾಮಕತೆಗೆ

ರಸ ಸರಸ ಋಷಿಗೆ

ಋಷಿಯ ಹುಂತಿಗೆ

ಹುಂತಿನ ತಂತಿಗೆ

ತಂತಿನ ಹಸೆಗೆ

ಒರೆದು ಬಂದೆ

ಎರಗಿ ಬಂದೆ

ಹರಸು ತಂದೆ

ಅರ್ಪಣೆ

ಕನಸಿನ ಕಡಲು

ಕನಸಿನ ಕಡಲಲ್ಲಿ

ಕಡಲ ಕನಸುಗಳಿವೆ

ಮರುಳು ಮನದಲ್ಲಿ

ಮರಳ ಹರಳುಗಳಿವೆ

ಹನಿಗಳಾಗಿ ಹುಟ್ಟಿ

ತೊರೆಗಳಾಗಿ ಹರಿದು

ನದಿಗಳಾಗಿ ಝರಿದು

ಭೋರ್ಗರೆಯುತ್ತಲಿದೆ

ಅವಿರತ ಭಾವದುನ್ಮಾದ

ಕಡಲ ಕಡಗೋಲಿನಲಿ

ಮತ್ತೆ ಧ್ಯಾನಕೆ ಸಿಲುಕಿ

ಊರ್ಧ್ವಮುಖಿಯಾಗಿದೆ

ಅರಿಯದಂತ ನಾದ

ಗೋವಂಶ

ಗೋವಿನ ಹಾಡನು
ಗುನುಗುತ ಬೆಳೆದೆವು
ನಮ್ಮದು ಗೋವಂಶ

ಮುರಳಿಯ ಗಾನಕೆ
ಮರುಳಾಗಿರುವೆವು
ಮರಳುವ ನಮ್ಮಯ ಯುಗಪುರುಷ

ಕೆಚ್ಚಲು  ತೀಡಲು
ಅರಳಿದ ಸುಮಗಳು
ನಮ್ಮಯ ವೇದಗಳು

ಕೆಚ್ಚಿಗೆ ಬಿದ್ದರೆ
ಮೃತ್ಯುಂಜಯರು ನಾವೇ
ಸಿಂಹಕೆ ಸಿಂಹಗಳು

ದಾಸೋಹಗಳು ಅವಿರತ
ನಡೆದಿವೆ ನಮ್ಮಯ ನಾಡಲ್ಲಿ
ಕೇಸರಿ ಜ್ವಾಲೆಯ ಒಲೆಗಳು
ನಗುತಿವೆ ಎಲ್ಲರ ಮನೆಯಲ್ಲಿ

ನಗುತಿದೆ ಬಾವುಟ
ಕಣ್ಣನು ಮಿಂಚಿಸಿ
ಬಾನಿಗೆ ಮೈಚಾಚಿ

ಮೂರು ಬಣ್ಣಗಳ
ನೂರ್ಕೋಟಿ ಬೆಳಕುಗಳ
ನಡುವಲಿ ಕೋರೈಸಿ

ಧ್ವಜವೇ ಸಹಸ್ರಾರ
ಕಂಬವೇ ಪುರ
ಬಲಿಪೀಠವೇ ಮೂಲಾಧಾರ

ನಮ್ಮದೊಂದು ಹಿಡಿ
ನಿಮ್ಮದೊಂದು ಹಿಡಿ
ಮೀರಲಿ ಮುಗಿಲಿನ ತೀರ.