ಜೀವನ ಬತ್ತುವುದಿಲ್ಲ

ಇಲ್ಲಿ ಆರಿ ಹೋಗಿದ್ದು
ಇನ್ನೆಲ್ಲೋ ಮೋಡ ಕಟ್ಟಿ
ಮಳೆಯಾಗದೇ ಹೋಗುವುದಿಲ್ಲ

ಇಂದು ಇಂಗಿದ್ದು
ಇನ್ನೆಂದೋ ಚಿಲುಮೆಯಾಗಿ
ಚಿಮ್ಮದಿರುವುದಿಲ್ಲ

ತೊರೆದದ್ದು ತೊರೆಯಾಗುವ
ಹರಿದದ್ದು ಹೊಳೆಯಾಗುವ
ಅಲೆದದ್ದು ನೆಲೆಕಾಣುವ ಸಾಗರ
ನೀ ಕಾದು ಕರೆದ ಮಹಾಪೂರ

ಚಿರನಿಯಮ

ನೋಡಿರುವೆ
ಗತಕಾಲದಿಂದಲೂ
ಚರಿತ್ರೆಯ ಪುಟಗಳಲ್ಲಿ
ಪಟ್ಟಾಭಿಷೇಕವಾಗಿ
ಮೆರೆದವರ
ಗೆದ್ದವರ ಹಿಂದಿನ
ಹೊಗಳುಭಟ್ಟರ
ಸೋತವರ ತುಳಿದ
ನೀಚ ಭೃಷ್ಟರ
ಯಾವುದೂ
ಚಿರವಲ್ಲ ಧರೆಯಲಿ
ಇಂದಿಗೂ ನೋಡುತ್ತಿರುವೆ
ಅವರವರ ಪಾತ್ರದಲ್ಲಿ
ಅವರವರು...
ಭಿಡೆ ಬಿಟ್ಟು
ಭಾಗವತನ ತಾಳಕ್ಕೆ
ಹೆಜ್ಜೆ ಇಡುವುದೇ
ಚಿರನಿಯಮ

ಕನಸುಗಾರ ಮತ್ತು ಕಲೆಗಾರ

ನಾನು
ಕನಸುಗಾರ
ಸುಮ್ಮನೇ
ಚುಕ್ಕಿಗಳ
ಬೀಜ ಬಿತ್ತಿ
ಸಾಗುತ್ತೇನೆ

ನೀರುಣಿಸಿ
ಬೆಳಕು ಕೊಟ್ಟು
ರಂಗೋಲಿ
ಬೆಳೆವ ಕಲೆಗಾರ
ಬೇರಿದ್ದಾನೆ

ಸೂ.. ಸುರು ಸುರು

ಆಯುಷ್ಯವೇ ತಿಳಿಯದೇ
ಕಳೆದುಹೋಗಬಹುದು
ನೀನೀಗ ಬಂದರೆ
ಕಳೆಯುವ ಕೊಡುವ
ಕೆಲಸ ನಿನಗೆ ಬಿಟ್ಟಾಗಿದೆ

ಕೂಡಿಸಿದ ಕೊಲಾಜೋ
ಕುಲಾಂತರದ ಮುಲಾಜೋ
ಎಲ್ಲ ನಿನ್ನ ಆಯ್ಕೆ

ಬಣ್ಣ ಸುಣ್ಣ ಬೇಡಬಿಡು
ನಕ್ಕು ನಗಿಸಿಬಿಡು
ಬಿಡಿ ಸುರುಸುರುಬತ್ತಿ ಬಡಜೀವ
ತನ್ನ ತಾನು ಬದುಕಿಸಿಕೊಳ್ಳಲಿ
ಬರಿದೆ ಬೆಳಕ ಸೋಕಿಬಿಡು

ಸಂಧ್ಯಾವಂದನೆ

ಎದೆ ಗೂಡ
ಹಕ್ಕಿಗೆ
ಹಾಲು ನೀರಲ್ಲ
ಬೆಳಕ ಕೊಡು
ಹಾರಲು ರೆಕ್ಕೆಯಿದೆ
ಗೂಡಬಾಗಿಲ
ತೆರೆದಿಡು
ಬಾನು ಬಯಲ
ಚಾಚಿದೆ
ಬೆಳಕಿನ ಹಣ್ಣಿನ
ಹಸಿವ ಕೊಡು
ಹೊನ್ನಿನರಮನೆ ಮೋಹ
ಕಾಡದಿರಲಿ
ಬೇಡ ಕಾಡುವ
ಬಲೆಯು ತಾಕದಿರಲಿ
ಬೇಕು ಹಲವುಗಳು
ತಾಕಿ ಸಾಯದಿರಲಿ
ನಿನ್ನ ನಗೆ ಬೆಳಕಿನೊಳಗೆ
ಹಕ್ಕಿ
ತತ್ತಿಯಿಡಲಿ
ಗುರುವೇ
ಹಾರಿಬಿಡು