ಕನಸಿನ ಕಡಲು

2012-02-12T10:44:00.000+05:30

ಕನಸಿನ ಕಡಲಲ್ಲಿ

ಕಡಲ ಕನಸುಗಳಿವೆ

ಮರುಳು ಮನದಲ್ಲಿ

ಮರಳ ಹರಳುಗಳಿವೆ

ಹನಿಗಳಾಗಿ ಹುಟ್ಟಿ

ತೊರೆಗಳಾಗಿ ಹರಿದು

ನದಿಗಳಾಗಿ ಝರಿದು

ಭೋರ್ಗರೆಯುತ್ತಲಿದೆ

ಅವಿರತ ಭಾವದುನ್ಮಾದ

ಕಡಲ ಕಡಗೋಲಿನಲಿ

ಮತ್ತೆ ಧ್ಯಾನಕೆ ಸಿಲುಕಿ

ಊರ್ಧ್ವಮುಖಿಯಾಗಿದೆ

ಅರಿಯದಂತ ನಾದ

ಗೋವಂಶ

2012-01-21T23:22:00.000+05:30

ಗೋವಿನ ಹಾಡನು
ಗುನುಗುತ ಬೆಳೆದೆವು
ನಮ್ಮದು ಗೋವಂಶ

ಮುರಳಿಯ ಗಾನಕೆ
ಮರುಳಾಗಿರುವೆವು
ಮರಳುವ ನಮ್ಮಯ ಯುಗಪುರುಷ

ಕೆಚ್ಚಲು ತೀಡಲು
ಅರಳಿದ ಸುಮಗಳು
ನಮ್ಮಯ ವೇದಗಳು

ಕೆಚ್ಚಿಗೆ ಬಿದ್ದರೆ
ಮೃತ್ಯುಂಜಯರು ನಾವೇ
ಸಿಂಹಕೆ ಸಿಂಹಗಳು

ದಾಸೋಹಗಳು ಅವಿರತ
ನಡೆದಿವೆ ನಮ್ಮಯ ನಾಡಲ್ಲಿ
ಕೇಸರಿ ಜ್ವಾಲೆಯ ಒಲೆಗಳು
ನಗುತಿವೆ ಎಲ್ಲರ ಮನೆಯಲ್ಲಿ

ನಗುತಿದೆ ಬಾವುಟ
ಕಣ್ಣನು ಮಿಂಚಿಸಿ
ಬಾನಿಗೆ ಮೈಚಾಚಿ

ಮೂರು ಬಣ್ಣಗಳ
ನೂರ್ಕೋಟಿ ಬೆಳಕುಗಳ
ನಡುವಲಿ ಕೋರೈಸಿ

ಧ್ವಜವೇ ಸಹಸ್ರಾರ
ಕಂಬವೇ ಪುರ
ಬಲಿಪೀಠವೇ ಮೂಲಾಧಾರ

ನಮ್ಮದೊಂದು ಹಿಡಿ
ನಿಮ್ಮದೊಂದು ಹಿಡಿ
ಮೀರಲಿ ಮುಗಿಲಿನ ತೀರ.

ಪಯಣ

2011-06-26T20:06:00.000+05:30

ಸರಿಬೆಟ್ಟದೊಡಲು ಸಿಡಿದಂತೆ ಸಿಡಿಲು
ಮರಿಹುಟ್ಟಿಬರಲು ಸೆಳೆವಂತೆ ಮಡಿಲು
ಪರಿಪರಿಯ ಸದ್ದು ಮಾಡುತ್ತ ಬರಲು
ಹನಿಗಳೆಡೆಗೆ ಏನಂಥಾ ಮಮತೆ....

ಬರಕೊಚ್ಚಿ ಪೂರ ಸಾಗಿಹುದು ದೂರ
ಕೊರೆಮಿಂಚುತಿರಲು ಸೆಳೆದಿತ್ತು ಕಾಲು

ಉರಿಬಿಸಿಲು ಸಿರಿಹಸಿರು
ತಂಗಾಳಿ ಹಿಮಕೇಳಿ
ಒಮ್ಮೆ ಮಂದ್ರ ಮತ್ತೊಮ್ಮೆ ತಾರಕ
ಮಳೆಯು ಬದುಕಿನ ಹಾದಿ
ಹಾದಿ ನಮ್ಮಯ ಬದುಕು
ಹನಿಹನಿಯೆ ಸಾಗುತಿದೆ ನಮ್ಮ ಪಯಣ

ಹೊಸದೂಟದಾಸೆ

2011-03-23T23:56:00.001+05:30

ನಗದ ಹಿಂದಿದೆ ಜಗವು
ನೊಗವ ಮರೆತು
ನಗುವ ಮರೆತಿದೆ ಜನವು
ಮಾಯಾಮೃಗಕೆ ಸೋತು

ಮುಂದಿಲ್ಲ ಹಿಂದಿಲ್ಲ ಮಿಂಚಿನೋಟ
ವಿಷದ ಮುಳ್ಳುಗಳಿಗೆ ಸಂಚಿನೂಟ

ಮನೆ ಬದುಕು ಹಸಿರುಸಿರು ಯಾವುದಿಲ್ಲ
ಕೊನೆಯಿಲ್ಲದೋಟದಲಿ ಭಾಗಿ ಎಲ್ಲ

ಹಿಡಿದು ನಿಲ್ಲಿಸು ಗೆಳೆಯ ನಿನ್ನ ನೀನು
ಗಂಜಿಯೂಟದ ಬಿಸಿಯ ಮರೆತೆಯೇನು
ಮತ್ತೊಮ್ಮೆ ಆಡೋಣ ಚೆನ್ನೆಮಣೆಯ
ಹೊಸದೂಟ ಮಾಡೋಣ ಸುಗ್ಗಿ ಬೆಳೆಯ

ಲೆಕ್ಕದ ಪಾಠ ಮತ್ತು ಪ್ರಶ್ನೆ

2011-03-06T16:11:00.000+05:30

ಪಾಠ ೧.
ಕಂಸಗಳು: ಆದಿ ಅಂತ್ಯವಿರುವ
ಒಡೆದ ಬಳೆಚೂರುಗಳ ಕಿಡಿಗೇಡಿತನ
ನೆನಪಿಸುವ
ಅಲ್ಲಲ್ಲೇ ಎರಡೆರಡು ಜೊತೆಗೂಡಿ
ಬಿಂದುವೊಂದನ್ನು ಬಂಧಿಯಾಗಿಸುವ
ಗಹಗಹಿಸುವ ಸ್ವಲ್ಪ ಕಿಡಿಗೇಡಿ ಮತ್ತು
ಅಷ್ಟೇ ವಕ್ರ ಬಾಹುಗಳ ಆಕೃತಿಗಳು.

ಇಂತಹ ಕಂಸನೊಬ್ಬನ ಸೆರೆಯಲ್ಲಿ
ಎಲ್ಲ ನೋವುಗಳನ್ನು ಅತ್ತು ಜಯಿಸಿ
ಎಂಟೊಂಬತ್ತು ಮಕ್ಕಳು ಮಾಡುವಷ್ಟು
ಏಕಾಂತವನ್ನು ವಸುದೇವ ದೇವಕಿಯರು
ಹೊಂದಿದ್ದರು ಎಂಬುದು ಪುರಾಣ

ಪಾಠ ೨.
ವೃತ್ತಗಳು:ಉರುಟುರುಟಾಗಿ ಸುಂದರವಾಗಿ
ಸೆಳೆಯುವ ಹಾಗೆ ಒಳಗೆ
ತುಂಬಿಕೊಳ್ಳುವ ತನ್ನ ಫರಿಯಿಂದ
ಎಲ್ಲರನ್ನೂ ದಿನೇ ದಿನೇ ಆಕ್ರಮಿಸಿಕೊಳ್ಳುತ್ತಿರುವ
ಮೌನ ಕುಣಿಕೆ.

ನಮ್ಮ ನಮ್ಮವೃತ್ತಗಳಲ್ಲಿ
ನಮ್ಮ ನಮ್ಮ ’ವ್ಯಾಸ’ರಿಗೆ
ಜೋತುಬೀಳುತ್ತಾ
ನಮ್ಮ ನಮ್ಮ ಫರಿಧಿಯೊಳಗೆ
ಉಸಿರುಗಟ್ಟಿಸಿಕೊಳ್ಳುತ್ತಾ
ಸತ್ತಂತೆ ಬದುಕುತ್ತಿರುವ ನಮ್ಮದು
ತೆರೆದ ವರ್ತಮಾನ

ಅಭ್ಯಾಸದ ಪ್ರಶ್ನೆ:
ಹಾಗಾದರೆ ಸೆರೆ ಎಂದರೇನು?

ಧೇನು ಪುರಾಣವು

2010-09-02T17:40:00.004+05:30

ಋಷಿಯೊಬ್ಬ ಲೋಕಕ್ಕೆ ಕರುಳಿಂದೆ ಒರಲಿದ

ಖುಷಿಯಿಂದ ಕರುಕರೆಗೆ ಮರು ಗೋವು ಗೆಲೆವಂತೆ
ನಶೆಗೊಂಡರಾ ಪಂಡಿತರನೇಕರನೇಕರಲ್ಲಿ ಹಸಿಹುಲ್ಲನಿತ್ತು
ಹುಸಿಪ್ರೀತಿಯಂ ತೋರಿ ಕರೆದರಾ ಸವಿಕ್ಷೀರವನು ಬರಿದೆ ಬಾಯಾರಿ

ಪಾನ ಪಂಡಿತನೊಬ್ಬ ಹಸಿಹಾಲಹೀರಿದನ
ವನ ಮೀರಿಸಲೊಬ್ಬ ಕುದಿಸಿ ಕೆನೆತೆಗೆದ
ವನವಸ್ತು ಸೇರಿಸಿದ ಬಹುರುಚಿಯ ತೋರಿಸಿದ
ಜನಕೆ ಬಡಿಸುತ ಹಿಗ್ಗಿ ಬಾಯಿ ಚಪ್ಪರಿಸಿದ

ಪಾಯಸವ ಮಾಡಿದರಾಯಾಸ ಮೀರಿದರವರು
ಸಾಯದೇ ಸ್ವರ್ಗವನು ಕಂಡೆವೆಂದುಲಿದರು
ಮಾಯಕ್ಕೆ ಮೇಲೊಂದು ಕರಿಕಂಬಳಿಯ ಹೊದ್ದರು
ಕಾಯಕ್ಕೆ ತಕ್ಕಂತೆ ನೆಲಬಳಸಿ ಗೊರೆದರು

ಕಾಲಕಾಯುತಲಿದ್ದ ಜಗದೇಕ ಪಾಮರನು
ಬಾಲಕನ ಮನದವನು ಲೀಲೆಯಲಿ ಹನುಮನು
ಕಾಲಸದ್ದಿಲ್ಲದೆ ಕೊಟ್ಟಿಗೆಗೆ ಬಂದನು
ಖೂಳ ಪಂಡಿತರನೆಲ್ಲ ಮನಸಾರೆ ಬೈದನು

ಕುಣಿಕೆಯಂ ಬಿಡಿಸಿದಂ ಚೆಂಗರುವ ಪುಟಿಸಿದಂ
ಹಣಕಿ ತಾ ನೋಡಿದಂ ಹಸಿದು ಹರಿದಿದ್ದ ಜೊಲ್ಲನುಂ
ಚಣಚಣಕು ಕುಣಿಯುತ್ತ ಕಣಕಣವ ಸವಿಯುತ್ತ
ಮೇಣ್ ಬಾಲವೆತ್ತುತ್ತ ಕುಣಿವ ಕರುವಂ

ಕಣ್ಣಲ್ಲೆ ನಲಿಯುತ್ತ ಮೈಎಲ್ಲ ನೆಕ್ಕುತ್ತ
ಬೆಣ್ಣೆಯಂತಿಹ ಕರುವ ಕಲೆತ ಹಸುವಂ
ಕಣ್ಣ ತುಂಬಿಸಿ ತಾನು ಪಾಮರಂ ಹಿರಿಹಿಗ್ಗಿ
ಚಿಣ್ಣನಂತಲೆ ಸವಿದನಾ ಋಷಿಸಹಜ ಕಾವ್ಯಮಂ

ನಿರೀಕ್ಷೆ

2010-07-06T17:17:00.000+05:30

ತಿಳಿನೀರ ಕೊಳದಲ್ಲಿ

ಚಳಿಯ ಗಾಳಿಗೆ ಸೋಕೆ

ಎದ್ದ ಅಲೆಯಂತಾಗಿ ಅದುರುತಿರುವೆ

ಕಮಲಗಳ ಸೋಕದಲೆ

ನನ್ನ ಚಳಿನನಗಿರಲಿ

ಎಂದು ತಂತಾನೆ ನಾ ಕೊರಗುತಿರುವೆ

ತಾರೆಗಳು ನಗುವಾಗ

ಇಳಿಸಿಕೊಳ್ಳುತ ಒಳಗೆ

ನೀರಲ್ಲೆ ಚಿತ್ತಾರ ಬರೆದು ನಲಿವೆ

ಕಾಯುತಿಹೆನಾ ಬೆಳಕ

ರಂಗುಗಳ ಸರಿ ಎರಕ

ಹೂಗಳರಳುವ ಪುಳಕ

ಬೆಳಕಿನೊಳು ಬೆಳಕನ್ನು ತುಂಬಿಕೊಳುವೆ

ದಾಸವಾಳ

2010-07-06T17:09:00.001+05:30

ನಿನ್ನ ಸೆಳೆವ ಗಂಧವಿಲ್ಲ
ನೀನೆ ಎಂಬ ಬಂಧವಿಲ್ಲ
ಇರುವಿನರಿವೆ ಒಲವು ತುಂಬಿ ನಗುವು ಮೊಗದಲಿ

ಬೆಳಕುದೇವ ನಗುವ ಕೊಟ್ಟ
ಹಕ್ಕಿ ಹಾತೆಯೊಲವನಿತ್ತ
ಕಂಡ ಮನುಜ ತಾನೂ ಒಳಗೆ ಬೆಳಗಿಕೊಳ್ಳಲಿ

ಹಾಸ ಹಂಚುವಾಸೆಯಲ್ಲಿ
ದಾಸಿಯಾದೆ ಸೃಷ್ಟಿಗಿಲ್ಲಿ
ದಾಸವಾಳದಾಳದೊಲುಮೆ ಸಿರಿಯ ಹಂಚಲು

ಅರೆನಿದ್ದೆಯ ಪದಗಳು

2010-07-06T17:08:00.001+05:30

ನವಿರು ನೂಪುರ ನಾದ
ಕಣ್ದೆರೆಯೆ ಕನಸು
ಮುಸುಕು ಮೋಡದ ನಡುವೆ
ಮುಸಿನಕ್ಕ ಚಂದಿರ

ಹಸೆಯ ಹಾಕಿದ ಹಾಗೆ
ಹುಸಿಯೆ ಬಳೆಗಳ ಸದ್ದು
ಹೊಸಿಲ ಬಾಗಿಲ ತೆರೆದೆ
ಚಳಿಗಾಳಿಗೂ ಮತ್ಸರ

ಅಂಗಳದ ಚಪ್ಪರದಿ
ಬೆಳೆದು ಬಿಳಿದಿದೆ ಕಂಪು
ನಾರು ಹೊಸೆಯುವ ಹಾಡು ಎನಿತು ತಂಪು
ಕಟ್ಟೊಂದು ಕೂಸು ಜೋಗುಳವ ಕೇಳಿರ?

ಕನಸು ಕಟ್ಟಿದೆ ಇರುಳು
ಮೊಲ್ಲೆ ಮುಡಿದಿದೆ ಹೆರಳು
ಎಲ್ಲೋ ಕಾದಿದೆ ನೆರಳು
ಇಲ್ಲಿ ನಿದ್ದೆಗೂ ಬೇಸರ!!

ಸಾಕಷ್ಟು ಸತ್ತು

2010-07-04T16:09:00.007+05:30

ಮಾವಿನ ನಾರುಗಳೆಡೆಯಲಿ ತುಟಿಯಿಟ್ಟು ರಸಹೀರುತ್ತಾ

ಕಪ್ಪೆಗಳ ಆಲಾಪದ ಅರ್ಥ ಹುಡುಕುತ್ತಿದ್ದೆ

ಇಲ್ಲಿ ಎದೆ ನಿನ್ನ ಕರೆದಾಗ ಕಿವುಡಾಗಿ ಗೊರೆಯುತ್ತಾ

ಮತ್ತೆ ಏನೂ ಕೇಳದಂತೆ ಗೊರೆಯುತ್ತಿದ್ದೇನೆ

ಎಲ್ಲೋ ದಾರಿ ತಪ್ಪಿದ್ದೇನೆ!

ಎಲೆಯಿಂದಲೆಲೆಗೆ ಇಳಿದ ಹನಿಗಳ ಸದ್ದು

ಭುವಿಯೊಡಲಲ್ಲಿ ಪಿಸುಗುಟ್ಟುವಾಗ ನಿದ್ದೆಗೆ ಜಾರುತ್ತಿದ್ದೆ

ಈಗ ನೋಡಿದರೆ ಫ್ಯಾನಿನ ಲವಲವದಲ್ಲಿ ಮಗ್ಗುಲು ಬದಲಿಸಿ

ಕರೆಂಟು ಹೋದಾಗಲೆಲ್ಲಾ ನೂರೆಂದು ಶಪಿಸಿ ಕಾಲ ತಳ್ಳಿದ್ದೇನೆ

ಎಲ್ಲೋ ತುಕ್ಕು ಹಿಡಿಯುತ್ತಿದ್ದೇನೆ!

ಜಗದೇಕವೀರರ ಕತೆಕೇಳಿ ಅದರ ಕನಸಲಿ ಬಿದ್ದು

ಇಲ್ಲದ ಮೀಸೆ ತಿರುವುತ್ತಿದ್ದೆ

ಕ್ರೀಂ ಮರೆತ್ತದ್ದಕ್ಕೆ ಹಲ್ಕಚ್ಚಿ ಹಾಗಾಗೇ ಕೆರೆದು

ಸೂಟಿನಲಿ ಸೇರುತ್ತ ಸಂತೆಗೆ ರೆಡಿಯಾಗಿದ್ದೇನೆ

ಸಕಷ್ಟು ಸತ್ತು ಮರುಸುತ್ತು ನಗುತ್ತಿದ್ದೇನೆ!

ನಾನು

2010-07-04T15:48:00.001+05:30

ನಿನ್ನೆಯ ಹೆಣ

ನಾಳೆಯ ಮಗು

ಸಾವಿರಾರು ನಾಳೆಗಳ ಬಸುರಿಯಾಗಿ

ಸತ್ತು ಹುಟ್ಟಿ, ಹುಟ್ಟು ಹಾಕುತ್ತ

ಮರಣ ಜನ್ಮ ಪ್ರಸವವೇದನೆಗಳ ಸಮರಸವ

ಸವಿಯುತ್ತ ಬದುಕುವಾಗ

ಆದಿ ಅಂತ್ಯಗಳ ಗೊಡವೆ ನನಗೇಕೆ?

ನಾ ನಡೆದಷ್ಟೂ ಜಗವು ಅರಳುತ್ತಿರಲು

ಕಣ್ಣು ತೆರೆದಷ್ಟೂ ಬಣ್ಣ ಕೆರಳುತ್ತಿರಲು

ಬೆಳಕು ಕರೆಯುತ್ತಿರಲು

ಮತ್ಯಾಕೆ ಬೇಕೆನಗೆ ಇಲ್ಲದ ಗೋಳು?

ನಿನ್ನೆಗಳ ಹೆಣಹೂತ ಭೂಮಿಯಲಿ

ನಾಳೆಗಳ ಬೀಜನೆಟ್ಟು

ಚಿಗುರುವ ಚೆಂದಕ್ಕೆ ಕಾಯುವ ಮಗು ನಾನು

ನನಗೊಂದು ಬೇಲಿ ಬೇಕೇನು?

ಮಂಜಿನ ಮರೆಯಲಿ

2010-05-03T18:43:00.002+05:30

ಎಲ್ಲಾ ಇಲ್ಲೆ ಮನೆಯೊಳಗಿದ್ದರೆ

ಮನಸಿಗೇನು ಕೆಲಸ?

ನಿನಗಾಗಿ ನಾನು ಅಲೆಯದಿದ್ದರೆ

ಸವೆದೀತೆಂತು ವರುಷ?

ದನಿಯ ಮೊದಲೆ ಕುಕಿಲನು ಕಂಡರೆ

ಅದು ಇನ್ನೆಲ್ಲಿಯ ಛಂದ?

ಮೋಡವೆ ಇಲ್ಲದೆ ಮಳೆ ಬಂತೆಂದರೆ

ಕಂಡೀತೆ ನವಿಲಂದ?

ಕನಸನು ಕಾಣದೆ ನಿನ್ನನು ಕಂಡರೆ

ಬದುಕಲಿ ಒಲವೆಲ್ಲಿಂದ?

ರಾತ್ರಿಯ ಛಳಿಯನು ಸವಿದರೆ ಮೊಗ್ಗಿಗೆ

ಮಂಜಿನ ಮರೆಯಲಿ ಲಾಂಧ್ರ;

ಕೈಯಲೆ ಬದುಕನು ಮೆಲ್ಲುವ ಬದುಕಿಗೆ

ಕಂಡೀತಲ್ಲೆ ಬ್ರಹ್ಮರಂಧ್ರ.

ದಂತಕತೆ

2010-04-29T17:43:00.002+05:30

ಮನೆಬಿಟ್ಟು ಹೋದ ಗುಬ್ಬಚ್ಚಿಯ ಚುಂಚಿನಂತಿದ್ದರೂ

ಅರಳಲು ನಾಚುತ್ತಿರುವ ಮಲ್ಲಿಗೆಯಂತಿದ್ದರೂ

ದೇವರ ಅದ್ಭುತ ನವ್ಯಕಲೆಯಂತಿದ್ದರೂ

ಕಡೆದು ಕೊರೆದು ಗೋಡೆಕಟ್ಟುವರಲ್ಲ;

ವಕ್ರತೆಯೇ ಸೌಂದರ್ಯವೆಂದು ಈ

ದಂತವೈದ್ಯರಿಗೆ ತಿಳಿಯುವುದಾದರೂ ಎಂದು?

ನಾವೆ!

2010-04-16T11:55:00.000+05:30

ಹೆಸರಿಗೆ ಪ್ರೇಕ್ಷಕರು

ನಾಟಕದುಸಿರಿಗೆ ಅವರೂ ಪಾತ್ರಗಳೆ!

ಬದುಕಿನ ನಾವಿಕರು

ತೇಲುವ ನಾವೆಗೆ ನಾವೇ ಜೀವಕಳೆ!

ಬಹು ಬಹು ವೇಷಗಳು

ಥರ ತರ ಪರಧೆಗಳು

ವಿಧ ವಿಧ ಲೆಕ್ಕಾಚಾರದ ನಡೆಗಳು

ಸುಳಿ ಸೆರೆ ಮೀರುತ ಹೊಸ ಹುಟ್ಟಿಗೆ ಸಾಗಿದೆ ನಾವೆ!

ನಾಟಕ ಮುಗಿಸಿದರೂ

ಕತೆ ಮುಗಿವಂತಿಲ್ಲ

ದಡವನು ಸೇರಿದರೂ

ಪಯಣವು ನಿಂತಿಲ್ಲ

ತೆಂಕಣಗಾಳಿಗೆ ಬಡಗಣ ಬಯಕೆ

ಮೂಡಣ ದೀಪಕೆ ಪಡುವಣದರಿಕೆ

ತಾರೆಗಳಲ್ಲಿವೆ ಆಗಸವೆಲ್ಲ

ಲೆಕ್ಕವೆ ಸಿಕ್ಕಿಲ್ಲ!

ಹೂ ಬಳ್ಳಿ ಮಾಲೆ

2010-03-17T11:49:00.004+05:30

ಎಂತು ನಗುವುದೇ ಹೂವು

ಸವಿನಗೆಯ ಕಲಿಸಿತೇ ಮಾವು

ಕಾಡು ಕಂಡ ಕನಸು ಕುಸುಮ
ಬೀಡು ಬಿಟ್ಟಲೆಲ್ಲಾ ಪ್ರೇಮ

ದಿನದ ಸಾವಿಗೊಂದು ಜೀವ
ಬೆಸೆವ ಬದುಕು ಎಂಥಾ ಭಾವ

ಎಲ್ಲೂ ಕಾಣದಂತೆ ಥಳಕು
ಲತೆಯ ಮಡಿಲಲೆಂಥಾ ಬೆಳಕು

ಹರಸುವವನ ಹರಕೆ ಹೂವು
ಒಂದು ಸಣ್ಣ ನಗೆಯ ಚೆಲುವು

ಎಂತು ನಗುವುದೇ ಹೂವು
ಕಲೆತು ಕಲಿಯುವ ನಾವೂ

ಸಂಜೆಯಾಗುವುದೆಂದಿಗೆ?

2010-02-28T21:22:00.000+05:30

ಭುವಿಯ ನಾಚಿದ ಮೊಗದಿ ರವಿತಿಲಕ ಹೊಳೆವಂತೆ
ಸಂಜೆಮಲ್ಲಿಗೆ ಮುತ್ತು ಮಣಿ ನಕ್ಷತ್ರವರಳುವಂತೆ
ಚಿನ್ನ ಕರಗಿದಂತೆ ಕವಿವ ಕತ್ತಲೆಯ ಕವಿಯಾಗೆ ಬೆಳ್ಳಿಚಂದಿರ ಇಣುಕುವಂತೆ
ಹಕ್ಕಿಯಂದದಿ ಬದುಕು ಚಿಲಿಪಿಲಿಸಿ ಎದೆಗೂಡ ಸೇರುವಂತೆ
ಸಂಜೆಯಾಗುವುದೆಂದಿಗೆ?

ಇಂದು ಕಾಡಿದ ಕನಸು, ಇಂದು ನೋಡಿದ ನವಿಲು
ಇಂದು ಗೀರಿದ ಗಾಯ- ಇಂದೇರಿ ಮೆಟ್ಟಿದ ಮೆಟ್ಟಿಲು
ತಮ್ಮದೇ ನೋವಿನಲಿ ತಮ್ಮದೇ ತಾಳದಲಿ
ತಮ್ಮದೇ ನಲಿವುಗಳ ಸ್ವಪ್ನಮೇಳದಲಿ
ಗುಂಪು ಗುಂಪಾಗಿ ಗುನುಗುತ್ತ ಒಡಲ ಸೇರುತಲಿ
ನಾಳಿನರುಣೋದಯಕ್ಕೆ ಹೋಚೆಲ್ಲಿ ಮಲಗುವ
ಸಂಜೆಯಾಗುವುದೆಂದಿಗೆ?

ಅದೇ ಭೂಮಿ ಅದೇ ಭಾನು
ಅದೇ ಮನಸು ಅದೇ ಕಣ್ಣು
ಕ್ಷಣಕ್ಷಣವೂ ನವಚಿತ್ರ ವರ್ಣಶೃಂಗಾರ
ಸಾಕ್ಷಿಗೊಬ್ಬನೆ ಸುಪುತ್ರ ಆತ್ಮನೆನ್ನುವ ಮಿತ್ರ
ಅವನವ್ಯಕ್ತದುದ್ಗಾರವೀ ವರ್ಣಚಿತ್ರ
ಆಕಾಶಗಂಗೆಯಲವ ಧೃವನಾಗಿ ಮಿಂಚುವ
ಮಂಜುಮುಸುಕಿದ ಬಣ್ಣ ಕಣ್ಣಾಗಿ ಕಾಣುವ
ರಸ ಸಂಜೆಯಾಗುವುದೆಂದಿಗೆ?

ಹೊಟ್ಟೆಹಾಡು

2010-01-30T16:52:00.004+05:30

ಹೊಟ್ಟೆಯಿಂ ಗಣಪನೂ

ಹೊಟ್ಟೆಯಿಂ ಠೊಣಪನೂ

ಹೊಟ್ಟೆ ತಾ ಹಿರಿದು ಸಕಲ ಜೀವರಾಶಿಗಳಲೆಲ್ಲ!

ಹೊಟ್ಟೆಯಲೆ ಹರಿದಿಹುದು

ಜಗವ ಹೊತ್ತಿಹ ಹಾವು

ಬಿರಿವ ಜೀವನಕೆಲ್ಲ ಹೊಟ್ಟೆಯದೆ ಕಾವು!

ಹೊಟ್ಟೆಗಾಗಿಯೆ ಜನರು ಉತ್ತಿ ಬಿತ್ತುವರಣ್ಣ

ಹೊಟ್ಟೆ ಮೀರಲು ಬರಿದೆ ಬಿದ್ದು ಸಾಯುವರಣ್ಣ

ಹೊಟ್ಟೆಪಾಡಿಗೆ ಗಟ್ಟಿ ನಿಂತು ಬದುಕುವ ಜಾಣ!

ರಟ್ಟೆಯಿಂದಲೆ ಹೊಟ್ಟೆ ತುಂಬುತಿರಲಿ

ಎದೆಯಮೀರುತ ಕೆಟ್ಟು ಬೆಳೆಯದಿರಲಿ

ಹೊಟ್ಟೆ ಹಾಡಿಗೆ ದಿನವೂ ರವಿ ಅರಳಲಿ!

ಬಾಲಿಶ

2010-01-20T13:12:00.001+05:30

ಕಾಣದ ಜತೆಗಾರ
ಕಾಡುವ ಜಲಗಾರ
ಕಡಲ ತಳಮಳವಾವುದೋ

ಕಂಗಳ ಕಲೆಗಾರ
ನದಿಗಳ ನೇಕಾರ
ಹರಿವ ಹಂಬಲವೇನದೋ

ನೇಸರನ ನಗಿಸುವನೆ
ಕೂಸುಗಳ ಅಳಿಸುವನೆ
ಸೂಸಿದ ಸೊಬಗೆಂಥದೋ

ಒಳಗೆಲ್ಲ ಆಡುತ್ತ
ಹೊರಗೆಲ್ಲ ಕಾಡುತ್ತ
ಜರಗುವ ಪರಿ ಎಂಥದೋ

ಸೀಳು!

2010-01-09T14:55:00.000+05:30

ಹುಣ್ಣಿಮೆಯ ಮೌನಕ್ಕೆ
ಶ್ವಾನದ ಸೀಳು
ತನ್ನ ನೆರಳಿಗೆ ಹಲುಬಿ
ಗೋಳಿಡುವ ಬಾಳು

ಚಂದ್ರ ಧರ್ಮದ ದೀಪ
ನೆರಳು ಭೂತದ ಪಾಪ
ಹಿರಿದು ಇರಿದೀತೇನೋ
ಎಂಬೊಡಲ ಪರಿತಾಪ

ಇಂತು ನಾಯಿಯ ಮಾಯೆ
ಕಾಡುತ್ತಲಿಹುದು
ನಾಡುನಾಡನೆ ನಾಯಿ
ಕಾಯುತ್ತಲಿಹುದು
ಬಡಜನರ ಒಡಲಿನುರಿ ನಭವ ತಟ್ಟಿಹುದು

ಸಹಜ

2010-01-02T18:57:00.001+05:30

ಮಾತನಾಡದೆ

ಮೌನವಾಗದೆ

ಕವನಗಳು ಹಾಡಿದವು

ಚಿಮ್ಮಲಾರದೆ

ಚೆಲ್ಲಲಾರದೆ

ಚಿತ್ತಾರ ಮೂಡಿದವು

ಸುಮ್ಮನಾಗದೆ

ಘಮ್ಮೆನ್ನಲಾಗದೆ

ಕುಸುಮಗಳು ಅರಳಿದವು

ತಣಿಸಲಾರದೆ

ಮನ ಮಣಿಸಲಾರದೆ

ಮಳೆಬಿಂದುಗಳು ಉದುರಿದವು

ಸದ್ದು ಇಲ್ಲದೆ

ಸನ್ನೆ ಇಲ್ಲದೆ

ಭಾವಗಳು ಹರಿದಾಡಿದವು

ಅವನೂ ಸುಮ್ಮನೆ

ಅವಳೂ ಸುಮ್ಮನೆ

ಹೆಜ್ಜೆಗಳು ಸಾಗಿದವು

ಆತ್ಮರತಿ-ಆಯ್ದ ಕವನಗಳು

2009-09-11T10:03:00.002+05:30

1.ಅಮ್ಮನ ಬುತ್ತಿ ಬೇರಿನಲ್ಲಿ...

ಬೇರಿನಲ್ಲಿ ಬುತ್ತಿ ಕಟ್ಟಿಟ್ಟಿದ್ದಳು ಅಮ್ಮ
ಮರಕೆಲ್ಲಿ ಗೊತ್ತು?
ಎಲ್ಲಿಂದಲೋ ಬಂದ ರಿವಿಕಿರಣಕ್ಕೆ
ಮುಖ ಮಾಡಿತ್ತು!

ಮೈ ಎಲ್ಲ ಮನಮಾಡಿ ಹಸಿರುಗನಸುಗಳ ಹೊತ್ತು
ಮಂದ ಮಾರುತಕ್ಕೆ ಮೈಯ್ಯ ಮರೆತಿತ್ತು!
ಬಳುಕುವ ಬಳ್ಳಿಗೆ ಸೋತು ಅಪ್ಪಿ ಬೆಳೆದಿತ್ತು!
ಬಣ್ನ ಬಣ್ನಗಳ ಹಕ್ಕಿಗಳ ಸಂಸಾರ ಮೈ ಎಲ್ಲ ಹೊತ್ತು
ತಾನೋಬ್ಬನೆ ಆಕಾಶಕ್ಕೇಣಿಯಾಗುವನೆಂದು
ಉಬ್ಬಿ ನಿಂತಿತ್ತು!

ಆಗಸವೂ ಸಿಗದೆ ಅಳುಕಿ ತಡಕಾಡಿ
ಬೇರೂ ಸಿಗದೇ ಬುತ್ತಿಯೂ ಸಿಗದೆ ಕಂಗಾಲಾಗಿತ್ತು!
ಮತ್ತೆ ಬೇರನ್ನರಸಿ ಕೆಳಗಿಳಿದಿತ್ತು!
ತಾನು ತಂದಿದ್ದ ಬುತ್ತಿ ಗೆದ್ದಲ ಗೂಡಿನಲ್ಲಿ
ಜೀರ್ಣವಾಗಿತ್ತು

ಬೇರುಗಳ ಸಂಧಿಯಲ್ಲಿ ಎಲ್ಲೋ ಹಣ್ಣಾಗಿದ್ದ ಈಗ
ಮಣ್ಣಾಗಿದ್ದ ಅದರಮ್ಮ ಹೇಳಿದ್ದು
ಆತ್ಮರತಿಗೆ ಮಾತ್ರ ಕೇಳುವಂತಿತ್ತು;
ಮಗುವೇ ನೀನಿನ್ನೂ ಬೆಳೆಯಬೇಕಿತ್ತು..

2.ನೆನಪಲುಳಿ ಕಂಪಾಗಿ

ಅಳುವಿನ ಬಳ್ಳಿಯಲಿ ಅರಳಿದೆ ಮಲ್ಲಿಗೆ
ಹೂ ನಗುತಲಿದೆ ಜುಮ್ಮಗೆ

ಹೂವೊಂದು ಹೊಸತಾರೆ ಕಂಪಿನ ರಸಧಾರೆ
ನಗುತಲಿದೆ ಬಳ್ಳಿ ಮನಸಾರೆ

ಕುಣಿಯಲೇ ಕಂಪು ಬಳುಕಲೇ ಬಳ್ಳಿ
ನಗಲೊಂದು ಹಗಲು ಹೂನಗುವ ದಿನದಲ್ಲಿ

ಗುಡಿಗಲ್ಲ ಮುಡಿಗಲ್ಲ ನಗಲೆಂದೆ ಅರಳಿಹುದು
ನಲಿಸು ಓ ಜೇನೆ ಮೆಲ್ಲಗೆ!

3.ಕತ್ತಲೆಯ ಕತೆ

ಕಣ್ಣು ಕಾಣದವನಿಗೆ ಕತ್ತಲೆ ಕಾಣುತ್ತದೆ
ಕಾರಣ ಕಣ್ಣು ಬೆಳಕನ್ನರಸುತ್ತದೆ

ಬೆಳಕಲ್ಲ ಸೂರ್ಯನೊಬ್ಬನ ಆಸ್ತಿ
ಆದರೂ ಅವರವರ ನೆರಳುಗಳಿಗೆ
ಹೆದರುವವರೇ ಜಾಸ್ತಿ

ಮತ್ತವ ಕತ್ತಲ ಕಂಡಿಲ್ಲ
ಕಾರಣ ಅವನಿಗೆ ನೆರಳೆಂಬುದಿಲ್ಲ

ಕತ್ತಲಿಲ್ಲದಿದ್ದರೆ ಅವನವನೇ ಅಲ್ಲ
ತನ್ನ ಬೆಳಕಲ್ಲಿ ಅವನು ಕಾಣುವುದಿಲ್ಲ

ನಾ ಕಾಣದ ಬೆಳಕು
ನನ್ನದಲ್ಲ
ನಿನ್ನದಲ್ಲ
ಇನ್ಯಾರದೋ ಅಲ್ಲ

ಅದು ಎಲ್ಲಾ ಕತ್ತಲೆಗಳ ಮಗು
ಬಣ್ಣಗಳ ದಾರಿಯಲ್ಲಿ ಬೆಳಕಿನೆಡೆಗೆ
ಸಾಗುವ ಆತ್ಮರತಿಯ ನಗು

4.ಅಷ್ಟೆ!

ಕೆಲವೊಂದು ಮಾತುಗಳಿವೆ ಹೇಳಿ ಬಿಡಲಾರದಂತವು
ಕೆಲವೊಂದು ಕವಿತೆಗಳಿವೆ ಅಕ್ಷರವಾಗಲಾರದಂತವು
ಕೆಲವೊಂದು ರಾಗಗಳಿವೆ ಹಾಡಲಾರದಂತವು
ಕೆಲವೊಂದು ಹೆಜ್ಜೆಗಳಿವೆ ಕುಣಿಯಲಾರದಂತವು
ಕೆಲವೊಂದು ನೆನಪುಗಳಿವೆ ಮರೆಯಲಾರದಂತವು

ಅವು ಸಾಗರದಡಿಯ ಮುತ್ತು ರತ್ನಗಳಂತೆ,
ಹೊರಬಂದರೆ ಆಡಂಬರಿಸಿ ಸಾಯುತ್ತವೆ!
ಹಾರಲಾರದೆ ಈಜುವ ಚಿನ್ನದ ಮೀನುಗಳು!

5.ನಿರಾಳ ತಾರೆ

ನಾನು ಪ್ರಕೃತಿಯ ವಿಕೃತಿ
ನೀನು ವಿಕೃತಿಯ ಪ್ರಕೃತಿ
ನಾನು ನಿನಗಾಗಿ ಹೆಬ್ಬಂಡೆಯೊಡೆದು
ಹೆಮ್ಮರಗಳ ಬಗೆದು
ಗೋಡೆ ಕಂಬಗಳ ಮನೆ ಮಾಡುತ್ತೇನೆ..
ಕಲ್ಲು ಮರಗಳ ಬೆಂಕಿಗೆ
ನೀನು ಜೀವ ಕೊಡುತ್ತೀಯ!
ಅದರಲ್ಲಿ ಸುಟ್ಟು ನನ್ನನ್ನೂ ಸುಡುತ್ತೀಯ!
ನಿನ್ನನ್ನೊಲಿಸಲು ಮೆಟ್ಟಿಲು ಹತ್ತಿದಷ್ಟೂ
ಚಂದ್ರನ ದೂರ ತಳ್ಳುತ್ತೀಯ!
ವಿಭ್ರಾಂತನಾಗಿ ಕೊನೆಗೊಮ್ಮೆ ಆಗಸ ನೋಡಿದರೆ
ತಾರೆಯಲಿ ನಿರಾಳವಾಗಿ ನಕ್ಕು ಬಿಡುವಿಯಲ್ಲ..
ನಿನ್ನ ರೀತಿಗೆ ಆತ್ಮರತಿಯೆನ್ನದೆ ಏನೆನ್ನಬೇಕು ಮತ್ತೆ!

ಸಿರಿಕಮಲ

2009-09-03T15:39:00.000+05:30

ಕಂದು ಕೊಳದಲ್ಲೊಂದು
ಸಿರಿಕಮಲ ಅರೆಯರಳಿ
ಕೆಂಪಾಗಲೂ ನಾಚಿ ಕೆಂಪಾಗಿದೆ.

ಕೆಂದಳಿರ ಸಂದಿಯಲಿ

ಕಾಣದೇ ಕುಕಿಲೊಂದು

ಮೌನಕ್ಕೇ ಮುತ್ತಿಟ್ಟು ಇಂಪಾಗಿದೆ.

ರಾತ್ರಿಯಲಿ ಹುಣ್ಣಿಮೆಯ

ಕನಸು ಬಂದಂತಾಗಿ

ನಿಟ್ಟುಸಿರ ಕಾವಿನಲಿ ಒಲವರಳಿದೆ .

2009-08-22T12:23:00.000+05:30

2009-08-22T12:19:00.000+05:30

2009-08-22T12:14:00.000+05:30

ನಿರೀಕ್ಷೆ!

2009-07-10T11:54:00.000+05:30

ಹನಿಗೆ ಮುಳುಗುತ

ಸುಳಿಸೆಳೆಗೆ ಸೆಣಸುತ

ಮಳೆಗೆ ಹೊರಟಿದೆ ಕಾಗದದ ದೋಣಿ

ಒಳಗೊಳಗೆ ಕನಸುಗಳ ಕವನ ಹೊತ್ತು!

ಏಳು

2009-05-17T14:57:00.000+05:30

೧.ನಿನ್ನ ಕಣ್ಣ ಏಳು ಬಣ್ಣ

ಕನಸು ಬಲೆಗೆ ಬಿದ್ದೆ

ಏಳು ತಳದ ಅಳಕೆಲ್ಲೋ

ಕಳೆದು ಹೋಯ್ತು ನಿದ್ದೆ!

೨. ರೆಪ್ಪೆ ನೀನು ಬದಿದಲೆಲ್ಲಾ

ಏಳು ಅಲೆಯ ಹೊಡೆತ

ಸುಮ್ಮನೊಂದು ಹಾಸ ಹೊನಲು

ಏಳು ಸ್ವರದ ಮಿಳಿತ!

೩. ಏಳು ಕೋಟೆ ಮಿರಿ ಬಂತು

ಎದೆಯ ಇಂಚರ

ಕಳೆದು ಜೀವ ನಿನ್ನ ಸೆಳೆವ

ಹುಚ್ಚು ಕಾತರ

೪. ಏಳು ಕದಲಿನಾಚೆಗೆಲ್ಲೋ

ಸ್ವಪ್ನದ್ವೀಪ ಒಂದಿದೆ

ಎದೆಯ ಬಡಿತ ಎರವಲಾಗಿ

ಏಳು ಜನುಮ ಕಾದಿದೆ

ಅಂತರಂಗ

2009-05-13T15:43:00.000+05:30

KPÁAvÀ ºÀ¥ÀºÀ¦¹

¤£Àß ¸À¤ß¢üAiÀÄ §AiÀÄ¹

PÀqÀ°£À¯É ¸É¼ÉªÀAvÉ ¸ÀÄ½AiÀÄÄwºÀÄzÀÄ.

PÁqÀÄªÉÄÃqÀÄUÀ¼À°è

ºÀQÌUÀÆqÀÄUÀ¼À°è ºÀ¹gÁV

ºÁqÁV ºÉÆªÀÄÄäwºÀÄzÀÄ.

gÀªÀÄå¢A UÀªÀÄåPÉÌ

vÀAwAiÀÄA ±ÀÈwUÉÆ½¹

±ÀÆ£Àå vÁgÀPÀ¢Ã ¨ÉgÀ¼ÀÄ ¸ÀªÉAiÀÄÄwºÀÄzÀÄ.

JzÉAiÉÆqÀ® UÀ¨sÀðzÀ°

¨sÀÆætzÁPÀÈwAiÀÄ°è

¤£Àß ªÀÄÄrUÉAzÉÃ ºÀÆªÉÇAzÀÄ CgÀ¼ÀÄwºÀÄzÀÄ.

೦5

2009-05-12T11:57:00.000+05:30

ಆಗಸದಲ್ಲಿ ನಗುವ ತಾರೆಗೇನು ಗೊತ್ತು

ಕತ್ತಲ ಮೌನದಲ್ಲಿ ನುಂಗಿದ ನನ್ನದೇ ಕಣ್ಣೀರ ಮತ್ತು!

04

2009-05-06T13:29:00.000+05:30

ಬತ್ತಿ ಸತ್ತಿದ್ದೆಷ್ಟೊ ಎಣ್ಣೆ ಬತ್ತಿದ್ದೆಷ್ಟೊ ದೀಪ ನಕ್ಕಿದ್ದೆ ಸತ್ಯ!

03

2009-05-04T14:11:00.001+05:30

ನಾನೆಂಬ ನೀನೆಂಬ ಉಸಿರ ಮೂಟೆಗಳು; ಕೂಡಿದರೆ ಕಡಲು, ಸೇರಿದರೆ ಮುಗಿಲು!

01

2009-05-04T12:28:00.001+05:30

ಈ ಬದುಕು ಕುಲುಮೆಯಲಿ ನೋವು ಬೆಂದಿಹ ಕೂಳು, ಹಿಡಿ ಒಲವು ಸಾಕದಕೆ ನಂಜಿ ಉಣಲು!

02

2009-05-04T11:37:00.000+05:30

ಕತ್ತಲಾವರಿಸಲೆನ್ನೊಳಗೆ ನಿನ್ನ ಹಾಸವಲ್ಲದೆ ಬೇರೇನೂ ಬೆಳಗದಂತೆ!