ಸಾಕು

ನೊಗದ ನೆಲೆ

ಬೆವರಾಗಿ ರಕ್ತ
ಸಾವಿರದ ಅನ್ನ
ಮುಡಿಪಾದ ತನ್ನತನ
ದಿನವೂ
ಬದುಕುವ ಸಾವೆಂಬ ಆಟ
ಸಾಯುವ ನೋವಿನೋಟ
ಬೆಳೆ ಕಳೆಗಳ
ಮಧ್ಯೆ
ನೊಗದ ಸಾಗಾಟ
ತಪದಿ ಗಳಿಸಿದ
ಅಗುಳು
ಗಂಟಲಿಳಿಯದಷ್ಟು ಋಣ
ಬೆಳಕಾಗದಿದ್ದರೂ ಬೆಳೆಗೆ
ಕೊನೆಗೆ ಕೊಳೆತು
ಗೊಬ್ಬರವಾದರೂ
ಆಗಬೇಕು
ನೊಗದ ನೋವಿಗೆ
ಈಡಾಗಲೇ ಬೇಕು

http://www.youtube.com/watch?v=jj5RGLjF-tM

ಬೆಳ್ಕೊಂದೈತೆ

ಏನಾಗೋದ್ರೂ ಬದ್ಕ್ಲೇಬೇಕು ಹುಟ್ಟಿದ್ದಕ್ಕೆ

ಕೈಯಲ್ಕಾಸು ಆಡ್ತಿರ್ಬೇಕು ಉಸ್ರಾಡೋಕೆ

ಭೂಮಿಲ್ಜನಾ ದಿನಾ ಸಾಯೋದ್ಕಾಸ್ಕಾಣೋಕೆ

ಬದ್ಕನ್ನೋದೇ ದಿನಾ ಚೂರ್ಚೂರ್ ಸಾಯೋದಕ್ಕೆ

ರಕ್ತಕರ್ಗಿ ಬೆವ್ರಾಗ್ ಹರ್ದ್ರೆ ರೋಗಾ ಇಲ್ಲ

ಹಂಚಿತಿನ್ನೋ ಮನ್ಸೂ ಇದ್ರೆ ಜೀವ್ನಾ ಬೆಲ್ಲ 

ದಿನಾ ಸಿಹೀ ತಿಂದ್ರೆ ಏನೂ ತಿಳಿಯೋದಿಲ್ಲ

ಬೇವಲ್ ಹೂವಾದ್ಕಾಲಕ್ಕೆಸ್ರೆ ವಸಂತ್ಕಾಲ

ಸುತ್ತಲ್ಜನ್ರ ಕಣ್ಣಲ್ ನಮ್ನಮ್ ಮುಖದ್ಬೆಳ್ಕು

ಕಾಣೋದಕ್ಕೆ ಎದ್ಯೊಳ್ಗೆ ಬೆಳ್ಕಿರ್ಬೇಕು

ಕಾರಿರ್ಳೂಲೂ ಕಂಗಾಲಾಗ್ದಂಗ್ನಮ್ಮೊಳ್ಗೈತೆ

ಒಳ್ಗೆ ಇಳ್ದು ನೋಡ್ತಾ ಇದ್ರೆ ಮಾತಾಡ್ತೈತೆ.

ಅದೇನಾಯಿತೆಂದರೆ,

http://mangalore.olx.in/the-bliss-iid-550481241




ಬೆಳಕು ಕತ್ತಲುಗಳ ನಡುವಿನ
ನೀರವ ಮೌನ
ಸಾಕಾಗಿ ನೀರು ಮಣ್ಣಿನ ಪಾನ

ಹೂವಾಗಿ ಅರಳಿತು
ಬಣ್ಣದ ಚಿಟ್ಟೆಯೊಂದು ಕೆರಳಿತು
ಹೂವಿನೊಳಗಿಳಿಯಿತು
ಇಳಿದ ಚಿಟ್ಟೆ ಸವಿಯಿತು
ಮೆಲ್ಲ ಮಾತನಾಡಿತು

ಹೂವಿನದೋ ದಿವ್ಯ ಮೌನ
ಬೆಳಕಿನದೇ ಧ್ಯಾನ

ಚಿಟ್ಟೆಯದೂ ಕಣ್ಣು ಹೊರಳಿತು
ಬೆಳಕು ಹೂವ ಕಂಡಿತು
ರೆಕ್ಕೆ ಹರಡಿತು
ಅತ್ತ ಹೊರಟಿತು

ಬಣ್ಣದ ರೆಕ್ಕೆ ಬೆಳಕಿನಲಿ
ಕರಗಿ ಬೆಳಗಿತು ಗಾಳಿಯಲಿ
ಮತ್ತೆ ನೀರಿನಲಿ

ಇತ್ತ ಹೂವಿನ ಧ್ಯಾನ ಬೀಜದಲಿ
ತಾನು ರೆಕ್ಕೆ ಬಿಚ್ಚುತ್ತಾ
ಚಿಟ್ಟೆ ಮೊಗ್ಗಾಗಿ
ಅರಳಿತು...

ನಾನೂತನಾನೂ

ಇಲ್ಲದಿದ್ದರಿರಲಾರದ
ಗುಣ
ಅಗಣಿತ
ಇದ್ದರೂ
ಇಲ್ಲದೇ
ಇರುವ
ನಿರ್ಗುಣ

ಕಾಣಲಾರದೇ
ಕತ್ತಲಾದ
ಬೆಳಕು

ಕಾಣಲೆಂದೇ
ಬೆಳಕಾದ
ಕತ್ತಲು

ನನ್ನ ನಾ
ನೋಡಲಾರದೆ
ನಿನ್ನ
ನೋಡುವೆ

ನಿನ್ನಲೇ
ಬೆರೆತು
ನನ್ನ
ಹುಡುಕುವೆ

ಹೂವೆ

ಬರಿದೆ ಅರಳುವೆ

ನಾನು
ನೀನು
ಆಗದೆ

ತಾನಾಗುವೆ

ಶ್ರೇಷ್ಟ ಜೀವಿ!

ಹಸಿದಾಗ ಮಾತ್ರ ಬೇಟೆಗೆ ಹೊರಡುವ
ಕಾಡು ಪ್ರಾಣಿಗಳು ಕಡುಕ್ರೂರಿಗಳು

ತುತ್ತು ರೊಟ್ಟಿಗಾಗಿ ಮತ್ತು ಅಲ್ಪ ಮಿಥುನಕ್ಕಾಗಿ
ಕಚ್ಚಾಡುವ ನಾಯಿಗಳದೆಂಥಾ ನಾಯಿಬುದ್ಧಿ?

ಬೀಡಾಡಿ ಗೂಳಿಗಳಿಗೋ
ಕುಟುಂಬ ಯೋಜನೆಯ ಗಂಧಗಾಳಿಯೂ ಇದ್ದಂತಿಲ್ಲ

ಹುಟ್ಟಾ ಗಲೀಜಿನ ಹಂದಿಗಳನ್ನು
ರುಚಿಯಿಂದ ಮಾತ್ರ ಮೆಚ್ಚಬಹುದು

ಅಷ್ಟೊಂದು ಅಕ್ಕರೆಯಿಂದ ಸಾಕಿದ ಕೋಳಿಗಳನ್ನು
ಮೋಸದಿಂದ ಕದ್ದೊಯ್ದು ಬಿರಿಯಾನಿ ಮಾಡದೇ ತಿನ್ನುವ
ನರಿಗಳದು ಠಕ್ಕು ಜೀವನ

ಚುನಾವಣೆಯೇ ಬೇಕಿಲ್ಲದೆ ಪ್ರಚಾರಕ್ಕೆ ಹೊರಡುವ ಕಾಗೆಗಳು
ಬಲು ಕರ್ಕಶ

ಕೈಕಾಲಿದ್ದು ಕಾಡನ್ನು ಕಡಿದು ವನಮಹೋತ್ಸವ
ಮಾಡದ ನಿಷ್ಪ್ರಯೋಜಕ ಜೀವಿಗಳಿಗೆ ಮಂಗಗಳೆಂದು ಕರೆಯಬಹುದು
ಗಂಗೆಯಂತಾ ನದಿಗಳ ನೀರಲ್ಲಿದ್ದೂ ಬದುಕಿ ಉಳಿದ ಮೀನುಗಳಿದ್ದರೆ
ನಮ್ಮ ಹೊಟ್ಟೆಯಲ್ಲಾದರೂ ಸಾಯಲಿ!

ಪ್ರಪಂಚವನ್ನು ಇದ್ದಂತೆ ಇರಬಿಟ್ಟು ತಾನು
ಬಣ್ಣ ಬದಲಿಸುವ ಜೀವೆಯೆ ಗೋಸುಂಬೆ!

ಮನುಷ್ಯನೋ ಇವುಗಳನ್ನೆಲ್ಲ ಮೀರಿದ ಶ್ರೇಷ್ಟ ಜೀವಿ!

ಇರುವೆ -ಇರವು- ಅರಿವೆ- ಅರಿವು

ನನ್ನ ಇರವಿಗೂ
ಈ ಇರುವೆಯ ಇರವಿಗೂ
ಇರುವ ವ್ಯತ್ಯಾಸವೆಂದರೆ,
 ನನಗೆ ನನ್ನ ಅರಿವಿಲ್ಲ,
ಇರುವೆಗೆ ಅದರ ಪರಿವಿಲ್ಲ

ನನ್ನ ಪ್ರಪಂಚ
ನನ್ನ ಪರಿಧಿಯದ್ದೆ
ಪರಿಧಿ ಅರಿವಿನದ್ದೆ
ಆದರೆ ನನ್ನರಿವಿಗೇ ಪರಿಯಿಲ್ಲ
ಅರಿಯದಿದ್ದುದಕ್ಕೆ ಪಾರವಿಲ್ಲ

ಬರಿದೆ ಇರುವಿನ ಕುರಿತು
ಇರುಳಿಡೀ ಕೊರೆದುಕೊಂಡು
ಮಲಗಿ ಏಳುವ ಮೊದಲೇ
ಇರುವೆಯ ಹುತ್ತ ನನ್ನನ್ನೂ ಮೀರಿ
ಮೇಲೆದ್ದಿದೆ!

ನಾನೂ ಇರುವೆ!
ಇಲ್ಲಿಯೆ!
ನನ್ನ ಪರಿಧಿಯಲ್ಲಿಯೆ!