ಅರ್ಥಕ್ರಾಂತಿ

ಬಳಲುತ ಕಾಡಲಿ ಅಲೆಯುತಲಿದ್ದೆ
ಹರಿಯುವ ನೀರಲ್ಲಿದ್ದಳು ಲಕುಮಿ

ಹಸಿವಲಿ ಬೇಯುತ ನೋಯುತಲಿದ್ದೆ
ಅನ್ನದ ಅಗುಳಲ್ಲಿದಿದಳು ಲಕುಮಿ

ತಿನ್ನುವ ಲೆಕ್ಕವ ತಪ್ಪುತಲಿದ್ದೆ
ರೋಗದೊಳಿದ್ದಳು ಲಕುಮಿ

ರೋಗದಿ ಬಳಲಿ ಬೆಂಡಾಗಿದ್ದೆ
ಹಸುವಿನ ಹಾಲಲ್ಲಿದ್ದಳು ಲಕುಮಿ

ಹಸುವಿಗೆ ಕೊಟ್ಟಿಗೆ ಕಟ್ಟುತಲಿದ್ದೆ
ಮಣ್ಣಲ್ಲಿದ್ದಳು ಲಕುಮಿ

ಮಣ್ಣನು ಗೆಲ್ಲುತ ಮದವೇರಿದ್ದೆ
ಕಾಮಿನಿಯೊಳಿದ್ದಳು ಲಕುಮಿ

ಕಾಮಿನಿ ಮೋಹದಿ ಮೈಮರೆತಿದ್ದೆ
ಕಾಂಚಣದಲ್ಲಿ ಲಕುಮಿ

ಕಾಂಚಣರಾಶಿಯ ಕಟ್ಟುತಲಿದ್ದೆ
ನೋಟದಲೆಲ್ಲಾ ಲಕುಮಿ

ನಡುರಾತ್ರಿಯಲದು ಕಾಗದವಾಯಿತು
ಹರಿಯುತ್ತಿದ್ದಳು ಲಕುಮಿ

ಹರಿಯುತ ಪೊರೆಯುತ
ಹರಿಯೆದೆಯೊಳಗೆ ಹರಸುತ್ತಿರುವಳು ಲಕುಮಿ

ಆಸ್ವಾದಿ

ಈ ಬಾನು
ಭೂಮಿ
ಗಿಡ ಮರ
ಒದ್ದೆ ನೆಲ
ಅದರ ಮೇಲಿನ
ಮುದ್ದು ಹೆಜ್ಜೆಗಳು
ರಂಗೇರಿ
ರಂಗೋಲಿ ಬಿಡಿಸುವ
ಬೆಳಕಿನ ಬಣ್ಣದ ರವಿರಾಯ
ನೀನೆಂಬ ನಾನು
ನಾನೆಂಬ ನೀನು
ಕೈಗೆ ಕೈ
ಕಣ್ಣಿಗೆ ಕಣ್ಣು ಕೊಟ್ಟು
ಬಣ್ಣದ ಬೆಳಕು ಕಾಣುತ
ಕನಸಿನ ಕವಿತೆ
ಹೊಸೆಯುತ್ತಿದ್ದರೆ
ಕತ್ತಲಲ್ಲಿ ಕರಗಿ
ಬೆಳಕಿನ ಮೌನ ಆಸ್ವಾದಿಸಬಹುದಿತ್ತು 

ಜೀವನಯಜ್ಞ

ಉತ್ಕ್ರಮಣಗೈಯುತಿದೆ ಅಗ್ನಿದಂಡ
ಬುಡಕಿಷ್ಟು ಉರಿಯ ನೀಡು
ನೋವಿಂದ ನೆಗೆದದಕೆ ಊರ್ಧ್ವಗತಿಯು 
ಉದರದಲಿ ಕನಸಗೂಡು

ಕಟ್ಟಿಕೊಂಡಿದೆ ನಾಳೆಗಳ ಬಗಲಿನಲ್ಲಿ
ನಿನ್ನೆಗಳ ತುಳಿವ ಜಾಡು
ಇಂದು ಎಂಬುದು ಉರಿವ ಒಡಲ ಬೆಂಕಿ
ಗುರಿಯೊಂದೆ ಬೆಳಕನಾಡು

ಸುಡುವ ಬದುಕಲ್ಲಿ ನಿತ್ಯಯಜ್ಞ
ಉಸಿರುಗಳ ಸ್ವಾಹ ಮಂತ್ರ
ತನ್ನ ತಾ ಕಳೆದು ಬೆಳಗಿಕೊಳುವ
ವ್ಯಾಪಾರ ಶಿವನ ತಂತ್ರ

ನನ್ನದೇ!?

ಮಣ್ಣಿದು ನನ್ನದಲ್ಲ
ದುಡಿಮೆಯ ಹಸಿವು ನನ್ನದೇ

ನೀರದು ನನ್ನದಲ್ಲ
ದಾಹದ ದಣಿವು ನನ್ನದೇ

ಗಾಳಿಯು ನನ್ನದಲ್ಲ
ಉಸಿರಿನ ತವಕ ನನ್ನದೇ

ಬೆಳಕದು ನನ್ನದಲ್ಲ
ಬೆಳಗುವ ಕಣ್ಣು ನನ್ನದೇ

ಗಗನವು ನನ್ನದಲ್ಲ
ಹರಡಿದ ಕನಸು ನನ್ನದೇ

ತನುವಿದು ನನ್ನದಲ್ಲ
ತರಚು ಗಾಯ ನನ್ನದೇ

ಮನವಿದು ನನ್ನದಲ್ಲ
ಮಾಯದ ನೋವು ನನ್ನದೇ

ಹೂವದು ನನ್ನದಲ್ಲ
ನಗುವಿನ ನಲಿವು ನನ್ನದೇ

ರಂಗವು ನನ್ನದಲ್ಲ
ನಾಥನ ಪಾದ ನನ್ನದೇ

ನಗೆಹೂ ಹಾಡು

ನಿನ್ನ ದನಿಯಲದ್ದಿತೆಗೆದ
ಹಾಡಲೆಂತ ಸೊಗವಿದೆ

ಬಿರಿವ ಕನಸ
ಕಂಡ ಸುಮಕೆ
ಭ್ರಮರ ತಂದ ಜಗವಿದೆ

ತಂಬೆಳನು
ತುಂಬಿತಂದ
ಚಂದಮನಲೂ ಕೊರಗಿದೆ

ಹಾಡನೆಣಸಿ
ದೂರನಿಂತು
ಮರುಗುವಂತ ಸೊಗಸಿದೆ

ಬಾಯಾರಿದ
ಮನಕುಲುಮೆಯ
ತಣಿಸಲೊಂದು ಹಾಡಿದೆ

ನಗೆಹೂವದು
ಬೀರಿದ ಘಮ
ಬಾಡದಂತೆ ತುಂಬಿದೆ

ಸಮಾಧಿ

ಎಟುಕದ ಬಾನು
ಎರಡಡಿ ಮೇಲೆ
ಕೈಚಾಚಲಡ್ಡಿಯಿಲ್ಲ

ನಕ್ಷತ್ರ ನಿಲುಕದಿದ್ದರೂ
ಹೆರಳ ಹರಡು ಎದೆಯಮೇಲೆ
ಮಲ್ಲಿಗೆಯು ನಗುವುದಲ್ಲ

ಕಾಣದಿರೆ ಜಗವು ಕಣ್ಮುಚ್ಚು ಹಾಗೇ
ಕನಸ ಕಾಣಲು ಸಾಲಿನಲಿ
ತುಸು ಕ್ಷಣವೂ ನಿಲ್ಲಬೇಕಿಲ್ಲ

ಎಲ್ಲೋ ಹುಡುಕಿದ ನೆಮ್ಮದಿ
ನವಿಲು ಒಳಗೇ ಗರಿ ಬಿಚ್ಚಿ
ಕುಣಿಯುತಿದೆಯಲ್ಲ