ರಾಸ ಪ್ರಾಸ

ಸಣ್ಣ ಆಸೆ
ಕೇಳು ಕೂಸೆ
ನಿನ್ನ ಹಾಡು ಕೇಳಲು

ಕಳ್ಳ ಶಾಮ
ಸುಳ್ಳರಾಮ
ನನ್ನ ಗಡಿಗೆಯ ನೀಡೆನು

ನಿನ್ನ ನಗುವು
ಬೆಣ್ಣೆಯಂತೆ
ನನ್ನ ಪಾಲು ನೀಡೆಯ

ಮೊಸರು ತಂಡುಲ
ನಿನ್ನ ಹಂಬಲ
ಗಡಿಗೆಯಲ್ಲಿ ಕಾಣೆಯ

ಗಡಿಗೆ ಬಿಟ್ಟು
ಉಡುಗೆ ತೋರೆ
ಎಷ್ಟು ಸುಂದರ ನವಿಲಿದೆ

ಬಿಟ್ಟರೊಡೆವುದು
ಚೆಲ್ಲಿ ಮಿಗುವುದು
ನಿನ್ನ ತಲೆಯ ಮೇಲೆ ಗರಿಯಿದೆ

ಕಾಡುಮೇಡನು
ಅಲೆದು ತಂದ
ಸಿಹಿಯ ಹಣ್ಣಿದೆ ನನ್ನಲಿ

ಹಣ್ಣಿಗಿಂತ
ಬಣ್ಣ ತುಂಬಿದ
ಮಾತು ಸಿಹಿಯಿದೆ ನಿನ್ನಲಿ

ನಾಚುವಂತೆ
ಮಾಡಬೇಡ
ಹೊಟ್ಟೆ ಹಸಿದ ಸಮಯದಿ

ದೋಚಿತಿನ್ನುವ
ಆಸೆ ಬಿಟ್ಟು
ಹಂಚಿ ತಿನ್ನುವ ಚಂದದಿ

ಕೊಳಲನೂದಲೆ
ನಿನ್ನ ಹಾಡಿಗೆ
ಜೇನು ಪಾಯಸ ಸವಿಯುತ

ನನ್ನದೇನಿದೆ
ನಿನ್ನ ಪಾಲಿದು
ಮುರಳಿ ನಾದವೇ ಜೀವಿತ